चेहऱ्यावरच्या बटा मागे सरताना
गालावरची लाली हळूच झाकताना
तुझी तारांबळ मला वेड लावते ग........
चारचौघातला चोरटा कटाक्ष
अन नजरेला नजर मिळाल्यावर
तुझे होणारे लाजाळूचे झाड
माझ्या हृदयात रुतून बसते.....
तरीही नकळत पापण्या झुकवून
देतेस माझ्या इशाऱ्याचे उत्तर
आणि हळूच इकडेतिकडे बघून
कोणी बघत नाही ना ते तुझं बघणं........
तुझा वेध घेणारी माझी नजर
इतरांच्या नकळत झेलताना
तुझी होणारी लडीवाळ कसरत
मनाला त्याची भुरळ पडते ग....
निसटत्या स्पर्शांसाठी कारण शोधत
सावधपणे रोमांच झाकताना
तुझा तो संकोच .. अरे देवा
काळजात घर करून बसतो....
हे सगळे तुझे विभ्रम आणि
तुझे ध्यानीमनी सगळीकडे असणे
हे गुपित दडवून ठेवताना
मन घायाळ होते ग......
